Muan Awards ເປັນພື້ນທີ່ເພື່ອສະເຫຼີມສະຫຼອງຄວາມຄິດສ້າງສັນຂອງນັກສ້າງສັນດິຈິຕອລຂອງລາວ ລວມທັງເປັນເວທີເພື່ອເຊື່ອມຕໍ່ພາກສ່ວນຕ່າງໆເຂົ້າກັນ ບໍ່ວ່າຈະເປັນ ມາເກັດຕິງເອເຈນຊີ, ທາເລັນເອເຈນຊີ, ແບຣນ ແລະ ສື່ຕ່າງໆ ລວມທັງພາກສ່ວນລັດ ແລະ ອົງການຈັດຕັ້ງສາກົນທີ່ກ່ຽວຂ້ອງ.

Muan Awards ເລີ່ມຕົ້ນຂຶ້ນໃນປີ 2019 ພາຍໃຕ້ຊື່ “ມ່ວນ ບຸກຄົນແຫ່ງປີ” ເຊິ່ງມີເປົ້າໝາຍເພື່ອສ້າງກິດຈະກຳທາງອອນລາຍ ແລະ ເປັນກຳລັງໃຈໃຫ້ກັບຜູ້ທີ່ເຮັດວຽກໃນແວດວົງບັນເທີງ–ຄວາມຄິດສ້າງສັນ ໂດຍສະເພາະໃນໄລຍະການລະບາດຂອງພະຍາດໂຄວິດ–19 ທີ່ເປັນອຸປະສັກຕໍ່ການເຄື່ອນໄຫວກິດຈະກຳທາງອອບລາຍ. ຈົນມາຮອດທ້າຍປີ 2024, ມ່ວນ ຈຶ່ງໄດ້ຈັດງານ ມ່ວນອາວອດສ໌ ຂຶ້ນມາເປັນຄັ້ງທຳອິດ.

ນອກຈາກການມອບລາງວັນໃຫ້ກັບຜູ້ສ້າງສັນເນື້ອຫາທາງອອນລາຍແລ້ວ, ມ່ວນ ຍັງມີເປົ້າໝາຍທີ່ຢາກຈະສ້າງແຮງບັນດານໃຈ, ສົ່ງເສີມ ແລະ ຍົກລະດັບແວດວົງຄວາມຄິດສ້າງສັນຂອງລາວໃຫ້ດີຂຶ້ນເລື້ອຍໆ ຍິ່ງໄປກວ່ານັ້ນແມ່ນປະກອບສ່ວນໃນການສົ່ງເສີມອຸດສາຫະກຳສ້າງສັນຂອງຄົນລາວໃຫ້ເຕີບໃຫຍ່.